草紙重出江湖!2014年一月號,草根行動媒體季刊。

[查看第一至第十六期草紙網上版,請去草紙舊網誌: https://grasspaperaction.wordpress.com/ ]

草紙重出江湖!2014年,春季刊。點圖放大閱讀。
大圖:https://grassmediaction.files.wordpress.com/2014/01/201401-f2.jpg
小圖:https://grassmediaction.files.wordpress.com/2014/01/2014-01f3.jpg

201401-F2

內文:

草紙——草根立場﹑草根議論。
第十七期,二零一四年一月號,草根行動媒體季刊。
http://https://grassmediaction.wordpress.com/

___________________________

草根焦點:2013年秋冬你未必留意的基層大事

文:牛與脾

掛住睇電視台新聞,津津有味地捧高王維基、八卦高官落區事故的這幾個月裡,原來已經發生左好多,更關基層事嘅事,唔信我地一齊睇下?

日期 兩三句講件事 點解關你事?
8/10 長實珠海九洲港貨運碼頭工人罷工,抗議二十年來人工不變。 有無諗過老闆會二十年都唔加人工?若果發生可以怎樣做?
26/10 市建局同發展商合作發展衙前圍,村民抗議當局無解決賠償安置問題,又拆卸原本承諾會保育的石屋。 市建局同發展商的發展計劃早已伸向香港各個角落,依家唔理,會唔會有日殺到埋身?租客可能被迫遷,小業主可能買不到樓住,你怎辦?
28/10 生產Nike、三星、即食麵等產品的印尼工人罷工,要求加薪及取消外判制度。 有無留意屋企買嘅野,原來唔少都係印尼製造?印尼打工仔,好多兩份糧都供不起仔女讀書,有病去醫院無錢無藥醫。啲貨咁平,背後人工有幾低?
31/10 有團體示威抗議迪士尼,聘請兼職工取代全職工,變相剝削員工福利。 有人話,愈大間公司就愈識得剝削員工,其實好多保安、清潔工友都係做緊大公司架喎,咁你有冇身同感受?
1/11 政府開始改建觀塘海濱橋底,常在橋底活動的市民,抗議失去公共活動空間。 改下一到改下又一到,由旺角同觀塘都已經無可倖免,會唔會遲下四個阿伯坐埋公園足棋講下時事,都要申請圥至得?
11-18/11 孟加拉制衣廠工人罷工,令超過一百間工廠停止運作,成功爭取提高最低工資77%。 當香港嘅最低工資兩年先加果兩蚊時,外國有工人發揮團結力量,成功爭取到加人工,你有冇諗過香港可唔可以做到呢?
18-19/11 長實興建的日出康城,旗下二判公司拖欠200個工友,超過1000萬元薪金,工友罷工堵塞地盤入口抗議。 想唔想知有一日老闆拖你糧,你可以點?
21/11 市建局向法院入稟,要求收回一間經營20年的茶餐廳,市建局勝訴,茶餐廳老闆要交出鋪位,向市建局賠償112萬,多年伙計將面臨失業。 收人間鋪仲要人賠埋錢俾佢,咁荒謬嘅事你以為淨係無記電視劇先有?呢個老闆對員工都不錯,有人性的老闆難求啦這個年代!
21/11 中電和港燈與政府簽訂協議,保證兩間公司未來五年,維持利潤水平不變。以家港燈就話來年不加,中電就話要加。年年賺年年加。 咁小市民想維持生計水平不變得唔得?你以為喺百物騰貴之時,政府會出手唔俾電費加?
21/11 中文大學年度畢業禮,原來工友工作量要加倍,加上有人請病假時,管理層不會安排人頂替崗位,工作量便會大增。 中文大學成日話自己強調人文關懷,但原來工友嘅待遇係咁差,點樣教育下一代尊重基層?
25/11 〔大專師生監察無良企業〕調查指,三星及蘋果電腦生產商,港資伯恩光學惠州工廠剝削工人,導致多宗跳樓事件。 大家手上的電話背後,都或者埋藏住好多條人命,好多個家庭……點解打份工,會做到要尋死?
25/11 房屋署正研究,扣減大專生申請公屋的分數。 今時今日大學畢業人工都唔高得去邊,買樓係妄想,竟然話你讀多人幾年書就唔俾你住?最後是否會迫窮家子女放棄讀大學?
27/11 巴西聖保羅世界杯球賽場館,建築時頂部倒塌,3名工人死亡。 大家期待緊睇世界盃果陣,又有冇諗過消費同歡呼背後又犧牲緊幾多人?作為打工仔的你,又是多少歡呼背後的犧牲品?
28/11 運輸及房屋局局長說,考慮,若果公屋住戶入息或資產超額,會要求他們立即交還公屋。 住公屋的街坊都知,其實你超額十元都係超額,本身已管得好嚴。個入息資產限額又好低,但你被趕出來,拎住的錢,又未必夠你一家出去租劏房+供書教學+衣食住行……
30/11 今年三月加完價,九巴再向政府申請加價4.3%,若獲批會在明年生效。 個個公共服務都話政府不負責,由得財團企業年年加,又唔見街坊人工加到追到通脹!?
3-7/12 世界貿易組織已在印尼峇里簽下協議,將來更多發展中國家包括中國、印尼、菲律賓等地,要開放市場給跨國企業。根據過往多年經驗,這定導致地價颷升,農民大量失業,血汗工廠大增,更多貧民無法生活而被迫遷徒。 你有無諗過一些基本公共服務,電、交通,為何年年賺年年加,為何不是政府自己做?有無諗過幾時開始政府帶頭外判,搞到你無啖好食?有無諗過點解建築工人唔夠工開,因為現時買預製組件起樓?全都是和所謂全球化和這類「協議」有關,政府簽左你都唔知!

~~~~~~~~~~~~~~~~~~~~~~

國際草根風情畫

文:樹熊

香港街坊傾媒體

「阿強︰我頂唔順無線啦——

阿桂︰咁你想睇亞視?維基台又開唔成……

阿強︰我係諗,點解我地唔自己搞電視台呢?

阿桂︰痴線!你估你有幾十億身家咩?去邊度搵節目播呀?唔通叫你阿媽教煮飯咩?仲有呀,比你報新聞,當你是是但但都好,你有無料、有無人報先?啲廣告商唔睇你,你邊有錢收?唔使問阿桂都知道搞唔到啦。

阿強︰唔係喎,拿,而家資訊科技發達,應該唔使好貴啫。街坊搞節目點解唔得先?我阿媽啲保健湯水秘方,食到我牛高馬大唔失禮架喎,好過雞汁丫嘛。新聞呢啲野,大台都係是是但但之嘛,阿明佢被市建局重建,見到的多過新聞講好多倍啦!靠廣告商睇的話,咁係咪唔鬧得米飯班主先?錢同資源,可以再諗辦法架啫……

阿桂︰你講到真既一樣喎。

阿強︰嘻……吹下水,講下啫。唉,好唔想睇無線呀……」

不一定是講笑的,其實有一種近似阿強講的,不靠商業運作、社區草根自己搞的小媒體,在南美洲的委內瑞拉已經存在多年,不單落地開花,而且足以左右社會大局,近年名正言順有政府支持。到底這些「草根社區媒體」是怎樣產生?和大家睇開的「大眾商業媒體」有甚麼分別?

草根小百科:什麼是草根社區媒體?

香港市民比較常認識的媒體,可以粗略分為「官方媒體」和「商業媒體」兩種,其實除此之外,還有一些由民間自發、獨立性較高的「公民媒體」,而我們談的「草根社區媒體」是公民媒體的一種。若與「官方媒體」和「商業媒體」比較︰

商業媒體 官方媒體 草根社區媒體
例子 無線、亞洲、有線 港台、中央電視台 委内瑞拉的社區電台網絡
擁有者 商人 政府 草根街坊
操作者 專業記者 專業記者 草根街坊;或認為商業媒體、官方媒體不可靠的人
財政來源 廣告客戶,往往是跨國企業 政府 籌集或用草根智慧解決,但由於規模較小,所需資金亦較小
營運方法 以營利為目標 因地而異,但或多或少受政府左右 協助草根人民掌握傳播所需的意識、技術、器材、渠道
内容 商業化、消費娛樂化,關心有能力付錢的人,往往在教你應該購買甚麼東西/服務 偶然有製作社會時事節目,但難免變成政治宣傳工具 由了解街坊需要的人(通常是街坊)提供,真正切合那個社區的需要

委内瑞拉,草根社區媒體的歷史故事

到底委内瑞拉的草根社區媒體從哪裏來?

委内瑞拉是一個充滿貧窮的國度。據估計,單是首都卡拉卡斯的二百多萬人口中,有接近一半是住在城市邊緣的基層社區。

1983 年,國際油價大跌,造成和近年金融海嘯差不多的經濟危機,此後數年,委內瑞拉政府欠債累累。1988 年,委國剛上任的新政府,決定按國際貨幣基金會指示「改善經濟」去還錢,政府減開支、削福利、公共事業私營化做齊,引發大規模示威。最終,政府在 1989 年 2 月大規模血腥鎮壓示威,死亡人數難以估計。

1990 年代,不少組織者在鎮壓的餘腥中,開始進入社區,冒險進行較小規模的基層組織工作。初時,他們會搞一些電影播放,聚集街坊分享食物、分享對不同事情的感想。後來一些組織者發現,電台廣播的技術較其他媒體容易掌握和使用,於是開始在基層社區搞電台。

由於缺乏資源,他們會佔領區内的廢棄建築物,並「非法」佔用大氣電波廣播。

1996 年,一批來自全國的社區電台,組成「委内瑞拉社區媒體網絡」,互相支援。

左右社會大局

1998 年,查維斯參選總統。查維斯的政綱傾向幫助基層市民,因而不太受商業媒體歡迎,但卻獲得社區電台的支持。在查維斯勝出後,開始將這些「非法」的草根電台合法化。

2000 年,委内瑞拉政府修憲,訂明「社區媒體」的法律地位。

2002 年,反對查維期的軍政商界發動了軍事政變,企推翻民選總統查維斯,獲得美國政府和主流商業媒體支持。這些商業媒體大力抹黑查維斯,並且封鎖政變的消息。與此同時,草根社區媒體的工作者和社會運動組織者,製作節目、印製傳單,透過社區媒體網絡傳播政變的真實消息。此舉令大量支持查維期的民眾上街,聚集於總統府外,成功擊敗政變,查維斯恢復總統職位。
2004 年至今,委内瑞拉的持牌社區媒體增加,亦得到政府的 18.5 億美元資助。當然也有堅決不接受政府資助的「無牌」社區媒體在運作。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

八子睇真啲:販賣盛女

文:八子

自《港男港女》同《盛女愛作戰》之後,「盛女」話題HIT爆全城,唔少電視節目都用港女吸睛求收視,無記今次就憑《MY盛LADY》突圍而出,一開播就高收29點,收視追得上台慶,網上嘅點擊率喺幾日間就超過10萬,風頭都可算一時無兩,而無記都可算係喺近日嘅罵聲中鹹魚翻身。

或者,因為十四巴刁蠻女友,唔少人都覺得港女實在天理難容,《MY盛LADY》可以幽刁蠻港女一默,實在大快人心。其實,攞熱話人物嚟開刀一向都係無記嘅拿手小技,從低層打工仔、新移民到盛女,每次全城熱話嘅主角,都似乎會淪為祭品,彷彿佢哋充滿缺點急需打救一般。今次嘅主角廣男哥係廣告公司嘅創作總監,雖然表面上刻薄,但業餘嘅使命就係將啲盛女包裝硬銷出去,而劇中女角有拜金食錢怪、有蠢中帶純嘅自卑女、有女王病嘅獨身主義者、有一心等待白馬王子人要佢搵富二代要求的雖然媽媽同姐姐一心要佢揾富二代,但仲係想揾個白馬王子嘅「o靚」模、有又肥又惡又有公主病,不但不務正業,言行舉止完全誇張,完全爆俗氣村長女,等等等等。彷彿道盡香港女人,唔係天真得有啲儍,就係拜金刻薄白鴿眼。當然,《家有囍事》系列教會我哋,觀眾都係喜歡嘩眾取寵嘅笑料,再配合一個超現實嘅美滿結局就係成功嘅公式,甚至每當呢類節目被狠評標籤同反智嘅時候,大家嘅回應都係:開個無傷大雅嘅玩笑,唔會有人當真嘅。

不過,電視劇都不過是長篇廣告,為吸客仔無所不用其極,販賣一啲似是而非嘅價值觀以求利。事實上,就同各大美容減肥廣告一樣,明知純屬虛構,但廣告舖天蓋地之下都一樣有人中招,笑下笑下,我哋就會不其然信左:個個身材都唔夠標準,都要減肥。最後咪真係肥左減肥公司!

電視劇就係經常誘導我地誤將某啲隨口噏當秘笈嘅標語當係普世真理,例如打工仔窮因為懶,只要你努力一定會出人頭地;你揾唔到老公係因為你丑、心地唔夠善良,只要知錯能改,加上少少包裝,都會揾到真愛。《MY盛LADY》無論點樣同情港女,道出佢哋背後嘅辛酸,但最後都只是話俾你知:只有男人先至係救世主,只要「重歸正途」,必定會有「好歸宿」。

喺CCTVB嘅電視劇,因為港女改過,最終都會揾到「好歸宿」:公關公司高層、健身室職員……都可算係唔憂柴唔憂米。偏偏電視劇唔會話俾你聽,香港有幾多人每日做足12個鐘但係仍然活喺貧窮綫下;港男盛女嘅根源其實係因為大家都將對方當成商品甚至投資;又或者,原來一個女人作為一個人仲有好多可能性……而我哋,就喺嬉笑之間被賣豬仔連自己都唔知。

~~~~~~~~~~~~~~~~~~~~~~~~~~~

草根文藝:工人寫詩給拾荒老人

編按: 鄧阿藍在香港打了幾十年工了,小巴站長、巴士司機、工廠工人都當過,藍叔一直為生活而藝術,以詩歌創作關心社會問題及弱勢社群。以下的詩歌,正表現出,在沒有退休保障的富裕社會裡,貧窮長者的悲哀……


拾荒老人在爭奪 

鄧阿藍

一對對乾癟的
老手正在爭奪
老人同時難覑一份免費刊物
骨質疏鬆發炎的長痛
流遍整個港鐵站

廢紙價大幅回落
彷彿是失業的小市民跌下去
沒人供養的長者
在電子化高速列車前面
伸出犇桿磨爛一樣的手
拉扯覑推撞覑

在爭奪一份求職雜誌
老邁的爭叫聲
如拋棄物呼叫世界
鋼鐵冷冷的圍欄
老手不斷變多
充滿了整個港鐵站

~~~~~~~~~~~~~~~~~~~~~~~~~~~~~

雜草攻略:基層養生都有法 

文:小草

秋冬乾燥,要潤一潤,基層街坊日挨夜挨,無時間煲湯,更無多餘錢搞「補品」,不過不怕,中草藥的優良傳統,依靠大自然給予的東西,讓你不用擔心!

1)便宜滋潤:甘蔗的滋潤效果不錯,不防一試!

2)養肺:秋天宜養肺,多吃白色或有辛味的食物,如薯仔(水煑)、梨、大蒜、洋蔥;

3)養腎:冬天宜養賢,多吃黑色,或鹹味,或觸感滑滑的食物,如紫菜(不是即食紫菜,是海味舖一餅餅那些,滾水一燙就成)、水煮的山藥(淮山)、馬鈴薯(土豆)和黑豆;

4)養脾:四季都養下啦,多吃黃色及帶酸的食物,如香蕉、杮、蘋果、番薯(蒸的)、粟米都可以的;

5) 明目養肝去疲勞:枸杞幾元有一大把,功用是明目、養肝、強筋骨、去疲勞,開工帶保暖壼放一把枸杞入去沖滾水帶住飲即可;

6) 虛寒著涼:紫蘇加生薑是中藥舖教的偏方,如果虛寒體質著涼感冒,二錢紫蘇加幾片薑,水煮半小時食水,一般人都可,只須幾元就處理掉。休息當然重要,但基層工友未必請到假,看看這條方是否幫到手啦。(體質人人不同,但可一試,我自己感冒初起即飲就兩日好)

7)挨夜要飲水:開工要飲水,尤其是半夜開工的如清潔工和保安工友,記住晚上十一時後,約45分鐘飲一杯水,較能緩和挨夜對身體的損害。

_________________________________________________________

草紙——草根立場﹑草根議論。
第十七期,二零一四年一月號,草根行動媒體季刊。
http://https://grassmediaction.wordpress.com/

廣告

About 草 媒

草根媒體 grassmedia09@gmail.com

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: