台灣關廠工人勝訴

[阿脾評論報導]

safe_image.php

「關廠工人」?哦~好似係台灣嘅一單勞資糾紛囉,前排好似搞到訓路軌添。

呢四個字,可能喺呢三兩年間先偶爾喺你眼球前出現,你亦可能對佢從來冇印象,知唔知都冇乜所謂,反正個個打工仔都係慘,自己都未理得掂,仲得鬼閒理埋台灣啲工人咩!

上周台北高等法院宣判,「五名關廠工人勝訴」,哦,工人贏左,得償所願,即係已經唔洗再抗爭啦?恭喜哂!!

咪住,件事係咪咁簡單就解決左呢?同香港嘅打工仔又有乜關係呢?

喺解釋之前先講下乜野係「關廠工人」先,

「關廠工人」,並唔係講緊有間廠叫「關廠」旗下果啲工人。。。

「關廠」,係講緊90年代台灣大批執左笠嘅廠房。

講到呢度,可能有人即刻諗,「哦~又係果啲老闆冇錢俾遣散費著左草,工人追賠償嘅野啦?香港有唔少啦!」

但實情係,呢啲廠唔係因為做唔住而執笠,而係因為當時大老闆們見外地生產成本比較低,就唔聲唔聲,無啦啦就宣佈執左台灣間廠,將資產轉移去外地,繼續賺大錢,但係一班失業工人應得嘅工資、遣散費同退休金就通通唔肯賣單,一於我有我賺錢,你有你捱窮。

睇到呢度,大家又可能心諗,「唔係嘛?政府冇幫佢地追返架咩?香港個勞工署都有扮下野幫下手丫?」

結果97年,勞委會(即係類似香港嘅勞工署)當時喺工人嘅激烈抗爭底下,向工人提出幫資方墊支住啲遣散費俾佢地,而筆錢政府就會向資方追討。

正當工人們以為爭取到自己應得嘅賠償,可以安穩生活之際,勞委會竟然喺事隔16年之後向呢班工人追數,話當年果筆錢只係「貸款」,係要還錢,仲預備左千萬計嘅訴訟費用黎控告呢班工人,強制要佢地還錢,迫到一班而家已經七老八十嘅工人又要再次出黎抗爭。

工人由12年起就一直進行抗爭,希望勞委會撤銷控訴,但係就一直不獲理會。明明係自己應得嘅錢,偏偏就俾政府迫佢地嘔返出黎,明明係大老闆們走數在先,偏偏政府追債嘅對象竟然係班失業工人。

事件擾攘多年,五百幾個個案當中有一半停留喺民事訴訟,另一半就轉移左去行政法院處理,民事訴訟當中有部份個案已經被宣判敗訴,而尋日行政法院就判左5個個案勝訴,工人唔洗還錢。

本來呢件事係值得高興,但當中嘅隱憂係,判決入面根本冇裁定到當年政府俾出黎嘅錢係「貸款」定係「社會補助」,只係基於筆數已經過左5年時限,冇得再追返,所以判工人勝訴,實質上並冇真真正正還工人一個公道!

政府當年冇做好把關,任由企業突然將廠房關閉,拖欠工人遣散費而不了了之,係第一錯。

然後事後唔向資方追討,反而將工人應得嘅賠償定義成「貸款」,控告工人,要求工人清還,做法無理,係第二錯。

當年突然冇左份工,毫不受社會保障嘅工人,經歷左俾老闆剝削之後,如今再受官司之苦!

尚有無數個工人正等候審判,仍然面對住被政府迫令還錢嘅威脅。

到底點解政府可以由得大企業大老闆拍拍羅柚走去第二度繼續賺錢,唔理失業工人死活?

點解明明係大老闆欠工人錢,偏偏政府追債係追啲工人?

呢件事,牽涉嘅已經唔止係究竟工人洗唔洗還錢,重點係政府對於保障勞工權益嘅取態。

香港成日發生有公司拖欠工人遣散費嘅事,勞工署話會跟進,咁究竟係做左啲乜你又知唔知呢?萬一呢啲事發生喺你身上,你又可以點呢?

世界上好多地方,對勞工嘅保障依然都係好缺乏,而家大部份嘅保障,其實就係靠大家一步一步努力爭取返黎,

當每人都留意多啲,思考多啲,集結力量,就係推動改變嘅源動力。

(圖片:苦勞網)

延伸閱讀:

廣告

About 草 媒

草根媒體 grassmedia09@gmail.com

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: