草紙2014年六月號，草根行動媒體季刊。

2014年，春季刊。

 

View this document on Scribd

View this document on Scribd

內文：

草紙——草根立場﹑草根議論。
第十八期，二零一四年六月號，草根行動媒體季刊。

https://grassmediaction.wordpress.com/

___________________________

草根焦點：長遠點使公家錢？

文: 樹熊

4月份財爺在財政預算案話要推「未來基金」，平時銀行游說你買那些乜乜基金就聽得多，「未來基金」又是什麼？原來是之前財爺叫一班學者、金融佬做咗個研究，話政府用錢的增長，一直快過收入增長，所以終有一日，政府支出將會追過收入。小組稱這個「搵錢唔夠使」的狀況為「結構性財赤」，並認為可能最快於2021 出現喎。

政府成日都計錯數，年年預算話會有虧損，結果都係有盈餘啦！而且今次搵埋金融佬做的研究，個結論就係話政府要儲錢落基金，就更加信唔過啦，政府買基金咪即係益晒金融佬囉！

之但係，財爺話要儲錢，咁錢從何來？

開源：向小市民開刀

財爺幾中意小組報告話「保障收入，穩定及擴閱稅收」，即係「收開的錢一定要收到」，「以後就要諗計收多啲錢」。但點收多啲錢？係咪加稅？財爺對加稅含糊其詞，咁話會研究。咁打算做乜先？

財爺話會打擊逃稅避稅，之但係追稅，政府一路都做緊，講左豈不等於冇講？跟住就講話加水費、加游泳池入場費、加文康設施費用咁喎，有錢住豪宅大型屋苑的，會所也有游泳池、運動設施，最需要用到政府游泳池、文康設施的都是買唔起樓的小市民啦，煮飯洗碗沖涼洗衫樣樣都要水，咁咪即係一刀刀咁割落草根小市民身上？唔係應該有錢人比多啲架咩？

有樣恐怖嘢，財爺都唔敢講。小組建議要將房委會「證劵化」、政府賣資產搵錢咁話，之前房委賣資產、搞領匯，搞到好多屋邨領匯街市買野都貴左好多，市民要買平野好多時都要特登搭車什至跨區買菜，又嘥車錢又嘥時間，已經搞到小市民雞毛鴨血，仲想再嚟？若果「證劵化」之後個市有咩冬瓜豆腐，房委會又話冇錢，又搵公屋市民開刀加租點算？！

節流：政府用於公共的開支

除左開源仲要節流，財爺話︰政府使錢的數量，唔可以多過香港生產總值(GDP) 的20%。咁即係政府在公共房屋、公共醫療、教育、安老等的開支，都會封頂？所謂香港生產總值的錢，大部份都係落晒入有錢佬的袋，開源又向小市民開刀，捱足一世到又老又多病痛，政府怎可再限制開支，你死你事？

未來基金啲錢點用　都冇小市民份？！

個名好好聽，但儲埋儲埋，「未來基金」有乜用呢？財爺話係政府日後唔夠錢使時，起「關鍵基建項目」用。唔通香港的未來關鍵，就係基建項目？

香港未來最關鍵的不是人嗎？犧牲人，用來興建大白象工程，最賺錢的不又是財團、地產商？

香港市民，除左政府的搵笨計劃之外，真係無其他選擇？

香港政府有7,000 多億財政儲備，只要拿500億就可開展全民退休保障，日後政府毋需再有額外開支，全港市民，包括在家勞動的主婦退休有保障，為何還不做？

～～～～～～～～～～～～～～～～～～～～～～

草根文藝：工人寫詩給建築工人

編按: 鄧阿藍在香港打了幾十年工了，小巴站長、巴士司機、工廠工人都當過，藍叔一直為生活而藝術，以詩歌創作關心社會問題及弱勢社群。

以下的詩歌，提醒住在樓房的我們，被忽視的建築工人的汗水……

流汗的建築工人　鄧阿藍

斜坡還在修葺
一塊一塊粗糙的面
酷熱中 汗水不斷落下
風雨中刮出凹凹凸凸的深痕
不停暴雨落下
山泥沖塌木屋
建築過很多大廈
掘著 一對粗手掘著
灰土翻起又再倒下
埋去了親人的身體
山坡傾斜著模糊的面容
冷汗 冷雨 繼續 落下 落下

～～～～～～～～～～～～～～～～～～～～～～

雜草攻略：

雜草攻略今期繼續同大家傾下基層平平地養生之道。

養心

中醫之道，夏天陽氣最旺，最好是養心，和陽氣。

先講養心，好簡單，食多些紅色的東西就好：西瓜、蕃茄、紅蘿蔔。另外就是苦味的食物如苦瓜。

不宜吃: 太甜、太肥膩的食物。

抗濕熱

夏天在室外聚的熱，本應發汗發出來，但一走進有冷氣的地方，就不能發汗，此時熱邪和濕邪都聚於體內。一個不小心，成日汗吹冷氣，極易變感冒。如果再飲食冰冷的食物飲品，濕氣就更重。

打工的，有時出入冷氣與極熱天氣之間，也在所難免。唯有在其他方面補足一下啦。

基層工友，好多要在室外活動的，不論地盤工友、裝修工友、搬運工友或清潔工友， 夏天最好帶定室溫的水，隨時飲，一次過不要飲太多。熱到好想買次凍水凍啤倒落肚時，請盡量忍一忍。遇到太陽太猛烈，就戴番頂淺色帽。雖然各位大佬大姐都好 厲害不會即時有事，但，大吉利是講句，這些小小的習慣就決定了你幾快有風濕和各種手尾長的病。

打工啫，唔洗同佢搵命搏架!

～～～～～～～～

_________________________________________________________

草紙——草根立場﹑草根議論。
第十八期，二零一四年一六月號，草根行動媒體季刊。

https://grassmediaction.wordpress.com/

廣告

標籤： 草紙、長遠財政規劃