2014年，秋季刊。
=============
焦點：
「全民養老金」？
前言：政府方案和民間方案，先要分清楚！各種全民養老金疑團，今期草紙逐個話你知！
香港的基層團體，多年一直在爭取全民養老金，所以民間都有好多不同方案。早前政府請終於請了個學者周永新搞了個方案（下稱政府方案），想話綜合下民間不同的方案。點知，這個政府方案並不理想。
其實，對於打工仔來講，多個民間方案之中，「全民退休保障聯席」提出的方案（下稱「聯席方案」）是最穩陣、又唔洗俾多份，可是，連這個方案都遭政府拒絕了。
周永新方案出爐後，一時全城熱話，大家猛話全民養老金咩咩唔好，但首先，大家要分清楚聯席方案與政府方案的分別先！（如果你唔鐘意睇字，中間大頁的圖解會幫到你！）
解開全民養老金四大謎團
問題一：係咪要供多份強積金？
答：全民養老金唔一定要加稅先做到！這個是政府方案同聯席方案的最大分別。聯席方案是從原本每月5%嘅強積金供款內抽出2.5%作為全民退保嘅供款。所以，按聯席方案，市民唔洗俾多一毫子！
問題二：納稅人養懶人？愈加愈多福利咪益哂班大陸人囉？
答：話明係養老金，一定要65歲後先拎到，香港有幾多新移民會係65歲先走落黎？就算真係65歲先落黎，只有兩種可能性：1)投資移民，呢啲人都唔當三千蚊係錢啦，可以排除；2)港人嘅內地父母，咁即係代表佢地喺香港嘅仔女起碼住滿七年而且有穩定工作才能申請，咁就唔會係所謂「養懶人」啦！
問題三：冇資產審查架喎，咁咪有錢人都拎得？
答：全民養老金唔係扶貧，係一種社會保障。全民一齊付出，一齊得到一個安全網，背後嘅理念就係有能力嘅人就俾多啲，就正如社會用納稅嘅方式去支撐整體基本開支一樣。例如免費教育，都冇資產審查，無論有錢人定係窮人都可以用。
再者，聯席方案會向盈利每年超過一千萬嘅企業額外徵收1.9%嘅利得稅作為供款，有錢嘅人未享受到呢每個月三千蚊嘅養老金，就已經俾左好多錢出黎，實在唔算益左佢地。
而且，咁龐大嘅養老金計劃，若要去審查每一個人「夠唔夠窮」，當中要涉及嘅行政費用大到你唔信！
問題四：外國都有做過，但做親都衰喎！
答：好多人話，歐洲好多國家好似希臘呀法國呀就係搞全民養老金搞到爆煲喎！個個國家都有搞交通又唔見個個國家因交通而爆煲？睇下你點搞啫。
講返香港啦！有人話到2027年就會爆煲，其實聯席方案到2027仍然有錢剩，只是開始果陣係「洗錢多過賺錢」，呢個「蝕錢期」預計會喺 2041 左右完結。目前香港人中，50 – 60年代出生的人最多，當呢一批俗稱「戰後嬰兒潮」嘅人全數退休，全民養老金嘅支出將會大於收入。但係老年人口會自然離世，呢個蝕錢狀況唔會持續。據推算，如果喺呢幾年開始推行，全民養老金到2046年會轉虧為盈。咁亦表示愈早開始推行全民養老金，就有愈多時間去「積穀種」，以渡過蝕錢期。
連政府的周永新報告都有計過，發現聯席方案真係最穩陣：假設最需要供款嘅時間(2020 – 2021) 又發生金融海嘯，經濟極差，復甦緩慢都好，聯席方案到2041年仍保持790億盈餘。
咁點解政府唔受聯席方案？你話呢？
～～～～～～～～～～～～～～
雜草攻略
基層工友成日要挨夜，又或三、四點爬起身開工，－－保安、司機、清潔工、廚房等工種都係咁，對個肝真係好唔好。電視節目成日叫人要做運動、要睡眠充足，根本就無可能，唔洗搵食咩！？雖然基層工種對工友來講真係壞肝，但在爭取到改善工時之前，工友都要養下肝喎，唔係到老左，大吉利是有咩病痛，到時又無全民養老金，醫藥費都好鬼甘！
小草查問過不同的書藉和中醫，了解到養肝唔係一定要洗好多錢。嗱，有七大蔬果可以幫你：
1) 大蒜：含維生素A、B1、C等，有抗菌、抗病毒、軟化血管等作用。
2)包菜 ：即係各種層層包住的菜，如椰菜，含維生素C、B1、B2、E、胡蘿卜素。
3) 海帶：含大量碘、藻酸、維生素、蛋白等，可化痰散結。
4)百合：具抗肝纖維化和肝硬化作用，常食可防治肝硬化。同時可益氣補中、益肺止咳。
5)胡蘿蔔：含胡蘿卜素，亦含揮發油。健胃消食，生熟均可食，可提高肝病病人維生素A水平，間接預防癌變。
6) 蕃茄：富含蛋白質、脂肪、無機鹽、煙酸、維生素C、B1、B2及胡蘿卜素。具有清熱解毒、涼血平肝之效，生熟食均可。
7) 青瓜：含戊糖、維生素B1及B2、煙酸、蛋白質。其細纖維具有促進腸道毒素排泄和膽固醇作用，其所含丙醇二酸可以抑制糖類物質轉化為脂肪，尤其適合脂肪肝的防治。
~~~~~~~~~~~~~~~~~~~~~
草根文藝:
一首關於工傷工人的詩－－鄧阿藍寫的《只是》
高高的建築物下
救護車運走了工傷的人
如果工人是一隻鳥兒
墜落的都會即時飛起
那就讓地盤設備不足吧
假如工人是一群鳥兒
大大的工廠裡
救護員抬走了工傷的人
假如工人是一條蚯蚓
失去的都會回長
那就讓工場裝置簡陋吧
如果工人是一堆蚯蚓
可看見的都是人體
肢體斷掉了
不能像樹木一樣再生
身體傷殘了
不能像昆蟲一樣再行
不能像樹木一樣再生
不能像昆蟲一樣再行
編按：
鄧阿藍本身是工人，他一直掙扎著一邊打工，一邊寫詩，今年，已是幾十歲的長者了。很多工傷工友，都是因為做得太過攰，精神體力透支，才發生意外。有啲人可能會話，老闆肯請工人肯做，不過係意外嚟啫」又有啲人會話，「香港地肯做唔會餓親」，但，點解，香港咁多基層工友，做餐懵做到透支，都顧唔到頭家？
