轉載自：香港廚師聯盟
話說唔少廚師都鍾意釣魚，對於梁振英花成幾百萬打造中環豪華釣魚區，梗係有啲意見。
先唔講工時咁長，廚師仲有無時間釣魚，重點係……釣魚為乜先，釣嚟梗係食埋佢啦！但你啲水質咁差，前排梁振英自己先去過海邊執垃圾，唔該肯花錢，就用嚟改善吓海水污染啦！梁振英仲打算連搞幾區，除咗中環之外，仲有大埔、青衣等，青衣海濱嗰邊係死海嚟，又多貨船，唔知釣乜！
既然有大志做一連串措施，花一大筆錢，咁我哋希望政府個方針係海洋保育！海洋保育！海洋保育！我哋喺啲海見到乜？油啦、洗潔精啦、拖鞋啦…… 有時聞到陣味真係唔想行過去，嗰種味係唔知點形容，難聞到又唔似死魚，又唔似發霉，都唔知咩味嚟。
你話中環釣魚，個海填到咁，仲有水質又適唔適合釣魚呢？以前星光大道本來有得釣，可惜俾人禁埋，釣都無得釣，而家你整個釣魚區出嚟，哇又有魚竿裝置呀、照明設施呀、指示牌呀、儲物架呀，工程開支都三百五十萬，每年經常花開支又九十萬咁，其實你做好環保，搞返好啲水質，大家就真係有魚釣，食落肚亦唔擔心喇！
