[深水埗小學雞街坊短訪系列:送中關我大件事?]之一

轉自:深水埗小學雞

前言:呢兩個月,有關反送中的事,全城鬧到沸沸揚揚。政府又鬧暴徒,示威者鬧政府暴政,在紛紛擾擾之中,深水埗街坊當然都各有睇法。之前見到北河街兩邊隧道的連儂牆,有人貼,有人撕,又好似有啲溝通,又好似無。到底我地呢個基層社區的街坊,點睇呢件事呢?
第一位受訪街坊, 經過昨夜的欽州催淚幾十粒之後, 有好深的感想, 即情寫左封信俾深水埗差人:
~~~~~~~~~~~~~~~~~~~~~~~~~~~~~~~~~
受訪街坊介紹:
師奶阿真(化名), 住深水埗住嚟住去住左十幾年, 散工為生…
~~~~~~~~~~~~~~~~~~~~~~~~~~~~~~~

給各位在深水埗當差的警察:
我係一個深水埗街坊, 在深水埗住左十幾年,都算係舊街坊啦。這區龍蛇混雜咩人都有,但係,深水埗真係一個基層的社區, 而你地,就係在基層社區服務基層市民的差人。

我親眼見過警察幫手搵失踨老人家; 也親眼見過, 被迫遷的劏房戶,在地產兇神惡煞爆入屋時, 來到的警察無偏袒有錢人, 勸退左個地產; 亦見過有深水埗差人, 在康文署拒絕街坊在街頭搞活動時, 有協助街坊去同康文署協調。
當然, 我也見過幾個差人圍位一個南亞街坊, 或者一啲小販, 協助食環清場, 也見過一班差人圍住一個其實乜都無做過的人, 係咪兇神惡煞地兇人地,欺負市民的都有。 如果唔係, 你地以為點解會有咁多基層街坊唔帶口罩出來鬧你地?

但係, 我地點鬧都唔會鬧你地[毅進仔], 因為深水埗大把中老少年, 連毅進學歷都無, 大家都係被教育制度排擠出嚟嘅人。 但我好想知, 你地今日凌晨, 在欽州街/福榮街交界, 點解要無啦啦拉左個身上乜都無的後生仔呢?因為佢金毛?因為佢睇落似無人會救佢好恰啲? 因為佢指住差人鬧? 今日凌晨近百個街坊一齊係果個位, 都無人明你地點解衝入人群就揀佢嚟拉喎! 點解呀?純粹泄憤呀?

老實講, 我亦有聽到有差人的子女, 在學校因為爸爸的身份被欺凌。 呢種人多蝦人少, 欺善怕惡的事, 無論做的人拎住乜野理由, 乜野身份, 我都覺得係唔啱!!! 我地反送中因為唔鐘意大陸無法治, 而且在大陸可能一人被定罪, 全家人都分分鐘要連坐被監視, 呢啲咁的事係野蠻的, 我亦唔鐘意香港人做呢啲野。
但係, 你地有無諗過, 幾百個荷槍實彈裝備精良的警察, 對住一係就手無寸鐵, 一係就只有初級裝備的市民, 都一樣係人多蝦人少?

講真, 昨晚示威者冇直接衝擊警署,好有機會係因為,當一知道深水埗警署外出現對峙時,就已經有街坊傳話,深水埗警署係二級歴史建築,叫大家高抬貴手。另外,冇示威者用火攻(或好像有人嘗試在荔枝角道燒垃圾桶,但好快熄滅左),有機會係因為以上,同亦有街坊傳話對面就係棚仔,請大家千萬唔好波及。我地所見, 示威者唔係果啲周街無差別打人的元朗白衫, 佢地都算有所不為, 都會理下啲街坊講的事。

總之, 無論咩都好, 你地係深水埗的差人, 我地深水埗的差人,就應該係唔洗學果班服侍中上環,金鐘權貴的差人, 亦無須學新界果啲可能係真正有黑背景的差人。

你地對我地深水埗街坊, 唔係有仇, 洗乜咁樣!? 昨夜放哂催淚, 連續在警署內不停咁係二樓射人地, 大佬, 我地好多街坊只係睇下發生咩事咋, 你地廣播, 在差館內廣播, 果時啲示威者都走哂去政府合署果邊啦, 你警告邊個啫? 咪警告我地囉變左!!?

真正在深水埗的差人, 唔該你地諗下, 做番啲服務基層市民的東東,何必為啲唔負責任推你地去死的權貴咁盡力呀!!!

深水埗師奶阿真
2019.8.6

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.