〔深水埗街坊短訪系列:送中關我大件事?〕之五(電工師傅有野講:到時人多行出馬路都好正常啫,深水埗成日都係咁架啦!)

轉自:深水埗小學鷄

前言:呢兩個月,有關反送中的事,全城鬧到沸沸揚揚。政府又鬧暴徒,示威者鬧政府暴政,在紛紛擾擾之中,深水埗街坊當然都各有睇法。之前見到北河街兩邊隧道的連儂牆,有人貼,有人撕,又好似有啲溝通,又好似無。到底我地呢個基層社區的街坊,點睇呢件事呢?

~~~~~~~~~~~~~~~~~~~~~~~~~~~~~~~~~

受訪街坊介紹:
電工師傅華哥(化名),住喺深水埗區差唔多十年啦

~~~~~~~~~~~~~~~~~~~~~~~~~~~~~~~~~

街坊想法:

送中條例就梗係唔掂啦,有啲人覺得自己唔犯法就無乜事,條例通過左或者唔會點影響我地呢個年紀既人,不過就好似「一國兩制」、「高度自治」咁,時間耐左就會變質,政府當初既承諾就會唔記得晒,到時我地下一代要接受中國法律,用堂而皇之既藉口,光明正大咁捉走啲發表意見既人。

我以前讀過愛國學校,知道共產黨既作風係點,亦都因為咁樣,我會睇晒左中右既意見,先至再作自己既分析。之前我都有去遊行,不過從來都無參與過啲衝擊既行動。上次有人去圍深水埗警署,我落街八卦下囉。我見班後生仔會鬧下警察,但係就見唔到佢地有掟石頭。之前睇片見到啲車經過時「分紅海」既畫面,果日我親眼見住佢地讓路俾消防車、救護車同其他車輛,都幾有秩序呀。街坊本身都企喺後面,後尾見警察等緊支援我就行前左少少,我都有提下前線年輕人,叫佢地要小心啲呀!

後生仔諗野可能比較直接,會想衝。我都明白學生係希望呢啲行動可以換來民主自由,不過會造成無可補救既後果,要用身體同前途去換,個代價真係好大。有啲大人可能覺得出錢去支援就夠,但其實唔係話出左錢就可以推人去衝架嘛,仲有機會俾人一個口實,話班後生仔係收錢做野。如果真係出解放軍,我諗所有人心靈上同精神上會更加迷茫迷失…

做我地建築呢行,好多人文化水平唔高,我聽過有工友話:「最好拉晒啲人去打靶啦,阻住我搵食!」不過呢,我就幾支持罷工罷市同啲不合作運動既。我覺得做呢啲抗爭都一定會有人受害架啦,叫啲人唔好黎香港旅行,可能經濟變差、香港變死城,有啲舖頭仲會執粒添,不過唯有政府出黎回應先可以解決到個問題囉。

今日街坊得閒都落街行下、買下野食啦,到時人多行出馬路都好正常啫,深水埗成日都係咁架啦!

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.