發夢經過維園

發夢經過維園,聽到一把唔純正廣東話嘅聲叫「香港人」,然後人群接住叫「加油」。聽多幾次,應該係印尼移工姐妹嘅口音。而且唔只得一個姐妹嗌出口。

呆咗。

自己一向唔太叫得出呢句口號,其中一個原因係,投入邊緣運動呢幾年,見得太多感受得太多「香港人」對邊緣群體嘅冷漠排斥傷害。好難擁抱呢個身份認同。有時會講笑,我寧願認自己係印尼人。

但移工仍然同香港人講加油。

聽嗰幾位移工姐妹嘅語氣,係用盡力咁嗌、高音到接近沙聲,佢地係知道呢句話咩意思,好firm,係滿滿的鼓勵。

而呢個並非孤例。移工團體爭取加人工的時候,係講緊要同本地人一齊爭取生活工資;2013年碼頭罷工,佢地話自己窮但都要捐物資,要同碼頭佬一齊有粥食粥有飯食飯;13+3政治犯,佢地上街頭撐……呢啲例子,數埋一大堆。就算「香港人」幾排斥佢地,佢地都仲係同「香港人」企埋一齊。

經此,又勾返起呢兩個月來的感動同糾結。

6.9遊行,見到新移民組隊反送中,大家會俾熱烈掌聲;南亞街坊抗擊連儂牆破壞者、跟隊深水埗遊行,大家話唔計較出身只要同一信念就係自己人;內地人撐反送中運動被拘捕,大家會嘆服佢地嘅勇氣;清潔工友舍身擋差佬搞到工都無得返,大家都好關心佢。係,種種重新理解都令人寬心不少,但係,呢啲野大家會記幾耐?又係咪只有佢地撐自己關心嘅野嘅時候,先會覺得呢啲都係值得尊重嘅人?

唉,只希望,運動過後,大家仍然會記得,呢班平時好多人睇唔起嘅人,移工、新移民、內地人、南亞街坊、基層工友,喺呢場運動入面,係點樣支持過大家。更希望,大家會當返佢地係一個個有血有肉嘅人,支持返佢地去對抗充滿剝削嘅文化同制度。畢竟,喺大家因佢地撐反送中先見到佢地之前,其實佢地好多都已經一直為香港付出,大家本來就係自己人。
(p.s.真係唔好睇唔起人,盞香港人自己蝕底。印尼、菲律賓嘅威權統治高壓過香港,而人地民間團體嘅組織強度、抗爭手法亦勁過香港唔知幾多倍,如果因為偏見而失去學習嘅機會,咁香港人就真係傻豬豬了。)

2013年移民家務工聲援罷工抗爭的碼頭工人 :有粥食粥 有飯食飯
http://www.engagemedia.org/Members/narcissan/videos/67097ca598df7ca5-670998ef98df98ef-we-share-what-we/view

廣告

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.

%d 位部落客按了讚: