[將垃圾變為神奇]系列 — (1) 「霉布」重製手袋

轉自:深水埗小學雞

以前喺香港嘅染廠,譬如說華南染廠和中國染廠,都會用一啲質料唔太好嘅布嚟試色,用一次就冇用。久而久之,呢啲染廠會儲儲埋埋好多染壞咗同試完機嘅「霉布」。雖然呢啲布叫「霉布」,但仲未係「霉得哂」,仲可以重用。但因為好容易撕開,根本冇可能用嚟做衫。東叔笑著問「你估下可以用嚟做咩?」東叔隨後開估指霉布好有用,呢啲霉布可以賣俾手袋廠,用嚟做黐珠手袋,出口去其他地方。
.
黐珠手袋顧名思意,就係黐有好多膠珠嘅彩色手袋。先將布沾上天拿水,再把已經排好在托上的珠仔,好似印仔咁「扱」喺棉布上。一個架只有一種顏色的珠仔,如果圖案有不同顏色,就要「扱」多幾次。因為珠仔係塑膠做,塑膠遇到天拿水會融,咁就可以黐死珠仔。之後就可以拎去車成手袋,手袋會十分漂亮、閃爍。不過手袋得「霉布」,係唔夠力嘅,所以手袋裏面仲有塊內襯,係用黏忍布(linen)**做。東叔話以前冇尼龍布就要靠黏忍布。黏忍布喺當時係最平嘅。據東叔形容,黏忍即係當時的人造棉,係最劣質嘅布,就算拎嚟做衫,都唔襟用。但人造棉只要打上厚漿佢就會好實淨,攞嚟做內襯就啱啱好。
.
當時,東叔同其他行家會走遍好多染廠,或者靠經紀從中安排「霉布」回收,再賣畀附近嘅手袋廠,例如以前喺田氏工業大廈有一間金宏手袋廠,有成兩至三層,規模好大。手袋廠都會特登向佢哋呢啲小販收購霉布,因為小販賣得平。所有交易都係以擔去計,一擔一擔咁賣,一擔大約有一百斤(姐係大約60kg)。
.
不過染廠扔棄霉布嘅時間不一,視乎佢嘅生意如何,所以東叔提到識人都係好重要嘅,比如話係工廠嘅師傅或者廠長。佢哋知道工廠幾時清倉,又或者知道邊個裁床底下多布碎,就會通知東叔或其他行家,過嚟做交易喇。
.
東叔又話,呢啲可以循環再用嚟做黐珠袋嘅片,一定要係棉布。不過當時最常用嘅布就只有棉布,仲未有所謂「的確涼」。反而「的確涼」就唔適宜重用成做黐珠手袋嘅材料,因為佢係人造布,加咗膠,就黐唔到珠仔。相反,棉布「有啲毛」細細的纖維,可以抓實啲珠仔。
.
做黏珠袋嘅「霉布」,仲有一個條件,就係必須要係黑色。如果收返嚟嘅布唔係黑色嘅話,東叔同行家會將舊布攞到染廠去染黑。東叔話染黑嘅用料唔需要很好,會退色嘅都唔緊要,隨便用「火灰」浸黑,再曬乾就可以。
.
東叔講笑話,呢個將舊布回收,再賣畀工廠製作手袋、銀包嘅過程,就有如呢排人們講嘅「環保」一樣,「將垃圾變為神奇」。或者係潮流趨勢變咗,呢個將霉布賣俾手袋廠嘅生意只係維持咗二至三年。東叔話,就連最大間的金宏手袋廠,都轉咗做人造皮袋,無再做黐珠手袋了。
.
*「的確涼」:一種加咗膠既人造布,並唔係天然材質。
.
** 黏忍 linen: 亞麻/仿亞麻,草本植物,能用以編織成亞麻布。東叔嘅講法係「搵啲爛樹仔造布」。
.
***相片來源:
(1) https://bit.ly/2YN9wd7
(2) https://bit.ly/2LHDCLo

#將垃圾變為神奇 #東叔 #棚仔 #訪談 #舊香港

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.