拾平台:組織

轉自:拾平台

成日話組織工作最重要係幫個街坊喺意識上同生活上充權,咁做拾荒議題都唔例外啦,不過講就咁講啦,拾荒者你估真係咁易俾你“溝”(i mean 溝通倒,唔係溝佢)到嘅咩,如果係易嘅NGO 一早做鬼左啦駛你嚟。今朝先同個街坊傾開呢個問題,剩係同一區嘅拾荒者都成日因為地盤問題,利益衝突而你忌我我忌你咁,再加上個個街坊都係性格巨星,唔係個個都咁好相處架,如果要建立關係,都唔能夠係短時間做到,起碼都預兩三年時間啦陰公。咁長時間去建立關係又邊到有機構肯做呀,不如做多啲入屋case 好過啦,仲要成日出去外展曬到隻野咁。

同街坊透過對話充權固然係難,但亦唔係唔可以,不過你要夾啱天時地理人和,你估你開組佢就一定要嚟你到呀?街坊會話我唔好執多幾個鐘紙皮好過哈哈。真係咁啱今日有啲野要幫個街坊搞先至叫做可以坐定定同佢傾過長計,先至可以聽下佢對回收業同點樣可以改善回收業嘅想法。街坊都覺得兩個問題喺回收業要處理,就係價格同埋食環,佢聽到我地講嘗試組織拾荒者去同回收商講價呢個方法,佢都覺得可以試下咁做,不過又係啲街坊咁有性格好難組織埋一齊,同埋又有好多係炒散嘅拾荒者,唔係長做好難控制佢地每日收嘅量保持同回收商嘅議價能力。

另外就係食環,如果搞唔掂身份問題好難溝通落去,街坊話佢地根本就係幫緊工友處理回收紙皮,係環保嘅其中一項工作,點解要當佢地係執垃圾掉垃圾呢,咁講唔通囉!明明日日都喺到開工幫食環手處理,又唔駛你俾人工我去幫你執,點解仲要針對佢地呢?我個人就覺得係一種好反智嘅思維,又唔駛你請佢打工,仲要幫你執埋,點解唔好地地對人?或有一啲協調,友善啲執下啲執法指引,你好我好咁唔係仲雙贏咩?我地仲喺到傾開,回收商其實可以請拾荒者,你縱使俾番最低工資,工作嘅鐘數唔駛咁長,五至六個鐘已經夠,每位拾荒者先至每月六七千蚊,請十零個街坊都唔駛十萬,其實唔係用好多錢,當然,又考慮到勞保呀,成本上漲呢啲問題啦,但長遠嚟睇,拾荒者始終係街頭巷尾收集紙皮嘅專家,大家根本冇左佢地唔得,咁點解唔諗多一步?等一班長者能夠又有工作,又有尊嚴去擔任呢個回收大使嘅角色呢?

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.