[2020新專欄!]~[地球人,反抗!]/二/那些老師不(可以)告訴你的事…

文:草全部都係草 /圖:牛

教科書呢樣野,由2012年開始就鬧都沸沸揚揚;跟住今年DSE,一條歷史問題又搞出軒然大波;然後因為年青人出來抗爭,政府又話唔係教育有問題,而係教育政治化所以有問題……

所有線索,都指向好多黃絲所講的「洗腦教育」,又或藍絲所講的「教壞細路」。不過,有時同七十後八十後那些比較願意發聲的人傾偈,他們又會話,自己細時讀書,淨係教你搵錢和顧自己,作文最緊要「經濟發展,安定繁榮」做收尾,所以咪有咁多港豬囉。咁,到底以前果啲「經濟發展,安定繁榮,政治咪理咁多」的教育,又係咪洗腦呢?有個法國社會學家叫阿爾圖塞(嗱佢死左架啦,「勾結」下佢亡魂應該唔犯法呱…),他的講法就係:無論咩內容咩立場的教育體系,只要係國家政權所進行的,就點都會教你服從於社會主流,點都會有啲「洗腦」性質架啦!(佢大叔本人的用語係:「國家機器 state apparatus)

咁面對呢啲野,唔同地方的人,係點面對呢?

我地首先睇下另一個泱泱大國,即係總統喺疫情下成日唔戴口罩果個國家呢。有個叫候活.至恩(howard zinn)的大叔(佢都瓜左架啦,十年前)。呢位至恩大叔,係出生於一個個新移民家庭。果時所謂「美國人」概念,就係從世界各地湧向[新世界]的移民(不過可惜,都唔包括北美洲的原住民的)。他18歲時在碼頭做工人,二戰時成為空軍。有幸打仗打佢唔死,番到美國後,作為新移民窮人打工仔和小兵的生活經驗,令佢重新思考一樣野:人民無法從人民的角度認識歷史,淨係識從統治者的角度認識歷史的話,咁就好易被啲當權者利用去送死和被剝削。

回國後他去左讀書,十五年前就出左本書叫做:a people’s history of the united states, 1492-present ( 《人民角度的美國史, 1492至今》)。這本書擺明了就係一本anti-textbook(反教科書),換句話說就是:「那些老師不(可以)告訴你的事」。如果從打工仔女角度而不從老闆角度會點理解?如果從小兵角度而不從將軍大人角度會點理解?如果從原住民或黑人角度而不從白人角度去理解會點?……至恩大叔總覺得,主流政府的教科書往往抹殺了人民抗爭的故事,抹殺了一般人在創造歷史上的貢獻,當然也會刪去政權不見得光的往事。

至恩大叔不單讀書寫書,本著佢的理念,同一班志同道合的人,在他過身前兩年(2008),建立了zinn education project[至恩教育計劃],旨在發展人民角度的歷史教材,讓全美國教師可以免費下載使用。這個計劃在他過身後仍然由兩個非牟利團體rethinking schools(反思學校)teaching for change(為改變而教育)合作營運著一,每年持續不斷生產另類歷史教材。我地雖然唔係美國人,但睇下另類歷史故事都幾有趣!

========================================

[地球人,反抗!]專欄/說在前頭…

去年,[反抗]以前所未有的速度和廣度,在香港變左流行辭彙,仲成日聽到咩國際連結呀,國際戰線咁。不過好老實,地球咁多人,到底連邊個結乜水呢?

小編識得個手足叫阿甘,淨係認得成日上新聞的有錢大國、旅遊勝地,如果唔係舊年好流行,根本唔會知地球上有烏克蘭同加泰隆尼亞(不過要喺地圖上指出嚟應該都有困難)。又譬如話,巴基斯坦同巴勒斯坦佢都唔會識分,講公民抗命淨係識得甘地同馬丁路德金……個名……

有見及此,小編覺得,不如搜羅下地球人反抗的故事一齊睇下啦,前車可鑑又好,好野齊參考又好,認清地球的共業又好,膠膠地齊齊笑下都好啦……

呢個地球喺香港人反抗之前已經有好多人反抗過,在香港人反抗的同時都有好多人反抗緊,而且都俾各種奇形怪狀的強權打到爆缸。到底我地we connect,係當自己係上層政治玩家咁運籌帷幄,同啲大佬握手齊齊玩野?定係理解自己係草民,所以連結下層的地球抗爭者,齊齊由下而上打過?還是,有沒有還是?

To whom,  the bell rings? With whom, we connect?

專欄其他文章:地球人,反抗!

===================

[草根.行動.媒體]

網頁:https://grassmediaction.wordpress.com

臉書:https://www.facebook.com/grassmediaction

telegram channel: https://t.me/actionofgrassmedia

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.