【無良 Agape Garden 膳心小館 – 好大嘅官威呀!】

轉自: 勞工組 

面對揭露黑心黃店,勞工組都掙扎左一段時間,希望盡最後努力溝通,希望拖欠手足代通知金嘅黃店膳心小館可以亡羊補牢,點知膳心小館負責人張小姐唔單止拒絕溝通,仲恐嚇要法律追究打去查詢嘅勞工組成員。

既然溝通不果,勞工組亦唔會對無良老闆客氣,決定揭露黑心僱主膳心小館惡行!

第一罪:明明主動炒人又扮事主自己辭職,借此拒俾七日代通知金

今次被剝削嘅事主五月嘅時候見到膳心小館招募手足,就應徵成為全職樓面員工,一直響膳心工作。直至七月二十八號,總店經理突然告知事主上頭下令要事主即日離職,並且要即時清走locker個人物品。

點知,事主響八月八號到九龍灣膳心總店領取最後一期工資時,卻見到薪金計算表上面白紙黑字寫住事主係"辭職"。薪金計算亦冇包括店方炒人應付嘅七日代通知金。

事主當時同總經理澄清自己唔係主動辭職,而係被炒,所以店方應該要支付代通知金,總理卻話自己話唔到事,叫事主自己同膳心老闆張小姐傾,反覆來回幾個電話中,張小姐一直堅持係事主主動以Whatsapp向經理辭職,但又無法俾出證據。

最後,膳心小館管理層張小姐堅持事主係辭職,並且拒絕再同事主溝通,話有咩就同佢嘅法律顧問講。

#勞法小知識
#僱傭條例第49A #須備存工資及僱傭紀錄的規定
#包括終止合約所需通知期 #無得屈
#張小姐不如拎封辭職信出嚟睇下啦

第二罪: 薪金組成黑箱作業,離職時被追扣上個月工資

膳心店主張小姐當時俾出嘅七月薪金計算表上,除左冇炒人要俾嘅代通知金,亦離奇地出現左追扣上個月(六月)嘅獎金$500同逐分鐘計嘅遲到罰款119.96。

點解當時六月份唔扣嘅?一炒人就扣,話六月無獎金又遲到又盛?早到有冇計埋先?

#勞法小知識
#僱傭條例第32 #扣除工資的限制
#係無遲到嘅 #案例麥永富訴滙進髮舍 #HCLA422000
#月薪係包月 #無得扣人遲到

第三罪: 拖欠工資

無論點都好,都需要離職後七日內付清最後一個月人工。但係事主由七月尾離職,到今日八月中仲未收到店方工資,已經違反左法例。

#勞法小知識
#僱傭條例第25 #僱傭合約終止時的工資支付
#任何情況下不得遲於僱傭合約終止後7天支付
#僱傭條例第26 #支付工資的方式及地點
#在僱員同意下 #存入該僱員名下的銀行戶口 #或郵政匯票付給
#無法例規定員工突登搵日上去你到簽收
#咁鐘意簽收上員工屋企簽囉

顧念膳心小館係知名黃店,響事主向勞工組求助,勞工組出第一個Post之前嘅八月十四日,其實我地都親身打過俾膳心嘅營運總監張小姐了解情況,睇下會唔會有誤會。

點知張小姐態度十分惡劣,又話唔會再回應事件,又話事主係自己辭職,有CCTV為證(但之前張小姐響電話中又同事主堅稱,係事主Whatspp向經理辭職,Whatsapp又點會有CCTV呢?),並且話自己唔會去調解,有咩上勞審庭見。之後仲話會法律追究我地打去嘅勞工組朋友,話有咩就同膳心法律顧問講,真係好大嘅官威。

豈料峰迴路轉,八月十五日勞工組出Post之後,膳心又透過幾位中間人接觸勞工組唔同成員,表示店方會等星期一人事部返工之後聯絡事主作調解,又問事主係咪掌握店方炒人嘅實質證據。

勞工組雖然感謝幾位中間人願意做和事佬,但我地唔明點解膳心小館兩日之間前倨後恭,前一日先話唔會調解、大家庭上見,後一日見到勞工組出左Post就約調解。

我地更加唔明白,點解膳心要透過中間人chok事主係咪掌握證據證明自己係被炒。其實事主係被炒定辭職,膳心心知肚明。之前又話有Whatsapp記錄又話有CCTV證明,前言不對後語,宜家見件事鬧大,又想試探事主有幾多證據響手。對此,勞工組真係非常失望,只見到欺詐同計算,睇唔到店方有真誠地反省自己非法剝削員工嘅行為。

我地再重申,黃色經濟圈內唔止有黃店,亦係要撐起響黃店工作嘅手足。
揭露黃店剝削員工,勞工組都有好多掙扎,但正正係愛之深,責之切,對於黃圈唔好嘅風氣,更唔可以視而不見。

——————————–
事主的話:

我一直認為返工只求工資,無任何情感。

但自從「黃店」嘅出現,
我發覺工作以外,更重要嘅係可以選擇為同路人服務,出多一分力
原來番工都可以講良知,職業都可以講人性

禁堂食令飲食業大受打擊
無薪假、 cut更、甚至裁員都無可厚非
因為無一份工包唔炒人,唔係單方面忠誠就得,都受外圍經濟因素影響
同道理,做生意都無話實包賺

通知期或通知金係保障勞資雙方
不論咩原因炒人,都要跟足法例
不論勞資邊一方,該有嘅通知金,該有就要有

聽落都好公平,好實在嘅野
估唔到會有一個大話冚一個大話,就係為左慳返七日代通知金
屈人自己辭職,而唔俾代通知金,可以嘅咩?

多謝大家睇到呢到

希望大家放下「黃店永遠是對的」嘅心態
記得最早期我哋講「黑白是良知、黃藍是政見」
目的係公平啲咁睇一件事,唔洗以德報怨;以直報怨;以德報德就夠
面對黑白,真係唔好盲撐!

我認為黃色經濟圈並唔應該剝削自己人
而係圈內人互惠互利

「良知」 並唔係口號,更要對自己內部員工都應該有
係一種實踐!

敢表態做黃店難!做一個有良知、敢於承認錯誤嘅黃店更難!

——————————
前文:
https://www.facebook.com/1076113639215003/posts/1580469938779368/

證據:
https://www.facebook.com/1076113639215003/posts/1581703828655979/?vh=e&extid=Up0p1sAw24wC75ph&d=n

 

====================================
[草根.行動.媒體]

網頁:https://grassmediaction.wordpress.com

臉書:https://www.facebook.com/grassmediaction

telegram channel: https://t.me/actionofgrassmedia

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.