市建奇趣錄之[宣誓,宣你老__ ,玩完我未?]

轉自:舊區街坊自主促進組

議員宣誓被DQ就聽得多,但原來市建局拆樓重建,居民想要安置,都要經歷「宣誓」呢關。

重建街坊要得到市建局安置,可說是「過五關斬六將」,隨時就被DQ。除左要合乎申請公屋的條件,仲要遞交比申請公屋更多的文件資料,例如租約及水電費單以外的住址證明,但市建局又唔一定認可喎。而為左滿足市建局對「文件」的苛求,街坊熬心費力咁配合,本以為交齊資料文件後就雨過天晴,點知原來先係開端,每個街坊都會被要求去民政事務處宣誓, 證明自己無講大話。

等等先,明明係你來拆樓,點解成日當啲街坊係「賊」咁樣,和就算自己申請公屋,都係填聲明書交俾房署,唔洗特登請假去民政處宣誓喎 (民政事務處署在平日星期一至五辦工)。街坊和市建局講程序不合理,有問題,市建局職員就來一句「你唔跟住做,我地做唔到野,安置唔到你架」,大大的官威壓下來,唔就範就拖返你一年半載,等你成棟大廈無人住,嚇到你驚。

好啦,街坊抽時間去民政署宣誓,但過程都係一波三折,被市建局耍到陀陀轉。有土瓜灣街坊試過宣誓後被市建局職員告知話「字眼唔岩」,話佢係宣誓果張紙講「家用」,應該要改返做「老公俾家用」先岩,要佢再去宣多次,街坊心諗「我一個小市民,點知你地局方既用字要求呀,你叫我去宣誓果陣,又無教我,又唔同我講有乜要注意,剩係叫我自己去搞,搞好晒先來挑剔用字,玩嘢乜?」

街坊谷住度氣,本身打算過幾日先再去民政處宣多次誓,點知過幾日,市建局職員又打來話之前睇漏左啲資料文件,叫佢宣誓果度要加多幾句,好彩街坊仲未去啫,唔係又白行多轉。難怪街坊咁氣憤話「我係無做野姐,唔等於我好得閒,我都要照顧屋企人,都有日常生活架」

如此來回,有街坊前後宣誓咗幾次,市建局職員先話無問題,可以安排下一個程序。睇到呢度,你可能以為下一個程序應該係派樓安置喇掛,對唔住呀,係安排你上港島區嘅律師樓簽左法律協議,承諾搬走先,局方先再慢慢安排安置既抽籤程序…

市建局成日話自己以「人」為本,見微知著,它發明既行政程序就充份體現所謂以「人」為本,係以留難「人」為本呀!

#市建奇趣錄 #市建局 #市建惡行日常 #市區重建 #舊區重建 #土瓜灣 #DQ資格 #郁你間屋大大聲 #要傾安置唔出聲 #市建拆樓人都癲 #玩完未

__
舊區街坊自主促進組最新開左IG,歡迎follow我地:
https://www.instagram.com/odaaghk/?hl=zh-hk

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.