轉自：Day Day Explode 日日爆 文：煮飯婆
有一日，我個腦突然間離家出走，我煮左右手邊個盒野出黎。麻婆豆腐 佢溶左，變左麻婆忌廉。
早個輪啊媽入左院，依家日日要自己煮，突然覺得其實佢煮飯都唔係咁難食姐…只係單調左少少，重覆左少少。自己煮飯一樣會伏，一樣會失手，一樣會難食，但幾難食都好，都好過依家無人陪我食…
我14歲啊爸就過左身。我阿爸本身都係傷殘人仕。係我細細個嗰時，佢仲可以行到同照顧自己。所以阿媽就去番工，阿爸照顧我。我媽媽本身智力上都有少少問題，生左我之後就有產後抑鬱。到後來阿爸要坐輪椅，就到我哋照顧佢。因為行動不便，阿爸嘅脾氣好差，成日都會打/鬧我地。到後來佢走左，就得番我同阿媽兩個。
我阿媽既問題亦都慢慢開始出現，因為屋企有D極品親戚，到我畢業之後，阿媽開始有幻聽，直到呢幾年，情況就更加嚴重。因為年紀大，開始腦退化，伴隨出現既係幻聽越黎越嚴重，成日聽到有人聲/見到有人影，見到有人想傷害佢。
而佢長年都有係精神科覆診，但係因為食唔足藥，情況一路都無減輕過。而我身為照顧佢既人，一方面我要番工，番緊工個時，佢會打電話黎話有人想害佢。番到屋企會不停地講。
其實我好無奈…點解釋佢都唔願意聽，仲覺得我有份呃佢、害佢。
呢2年已經無一個人出門。佢覺得好多人都想害佢…個種感覺好難以形容。日復日要照顧佢。
佢退化番去做小朋友，佢理解唔到我講既說話…每一次爭執，佢都會道歉，但係唔會改善任何行為，我都覺得好辛苦…因為佢就係一個小朋友，你無辦法同佢講道理。
開始退化到會唔識去廁所，但係佢會覺得係正常、無問題
要照顧無智老人真係好困難…加上因為佢身體問題多，經常都需要覆診。要經常請假同佢去。
佢依家65歲，佢喺屋企，都仲可以行得走得，我實在唔忍心送佢入老人院。
(如果要請假，公司會唔會為難你？)老闆會講一兩句，話我要照顧佢，第時點算之類，但會批假。身邊朋友都叫我送去老人院，因為大家都覺得咁落去唔係辦法。
我明白人會老、會退化，但係我接受唔到呢一日黎得咁快。我媽係好任性嗰種人，要就一定要有，所以好難照顧，就算去到住院，D姑娘會打黎俾我投訴。但係我都無辦法…我可以點做啊..打比我，佢發洩左不滿，但我呢？我可以點做？問題一樣存在。
我好幾次都有諗過…殺左佢，我再自殺……一家三口就可以團圓啦…
我屋企得我一個，真係好難照顧佢，好多人都理解唔到…其實真係好辛苦，無曬所有私人時間，你去邊都避唔開個種心情。
(之前有冇搵人求助？)好難受，而你講比其他人聽，佢地會反轉頭鬧你，佢係你阿媽，你應該照顧佢，你一定要照顧佢。我唔係唔想照顧，但我真係無辦法啦…
(BULLSHIT，政府點解唔做？癡線，將責任推向家庭成員，政府唔係冇地、唔係冇錢) 有錢、有人，唔起老人院。公院同買位服務比好多私院都好好多。
我之前有睇一個中醫，佢話我咁樣唔係辨法，會搞死我，佢怕我會去自殺。
依家阿媽今次入院做咗評估排隊(安老服務統一評估機制)，之前因為佢意願，所以一直未排。日間照顧嗰種，接/送時間完全同番工時間重疊，根本就安排唔到。依家排公家佢仲識行，5年起跳。
(你依家生活作息係點？)佢喺度嗰時，朝早起身幫佢打針，跟住走去番工，跟住夜晚番黎食飯，再睇下佢有咩需要。
依家佢去咗醫院，每個星期六、日，兩日去拎食物、用品比佢。當你得自己一個，就會變或24 X 7 X 365嘅工人，永無止盡。如果有錢請工人，仲可以有人照顧下。依家除左老人院同自己照顧之外，根本無第三個選擇，日日係困獸鬥。
以前細個照顧阿爸，依家大咗照顧阿媽。無童年，無幸福可言，日復一日。政府無嘢可以幫到，社工唔夠，好多嘢無人跟，亦無咩實際事情可以幫到忙。我信因果，係我欠左佢地，所以我都認命。老人院太多古怪事情，未到最後真係唔想佢去。
我聽過私院 (私營安老院) 啲伙食超差，見過老人院D公公婆婆無人理嘅可憐，我唔想佢去…其實政府日間照顧可以做d好，接送安排可以改善下，照顧人邊洗咁辛苦。
香港好多老人家，大家辛苦咗成世，想平安過埋佢都唔得。
(好似佢入左院, 你會多D時間休息？) 會，因為唔洗點照顧佢，時間安排可以自由d，番工又唔洗怕佢有意外，因為知道有人會睇住佢。3年前如果個朝早我番左工，佢早就死左。
(3年前發生咩事？) 因為佢心衰肺積水，無人知就會失救，由佢發作去到醫院，已經要即時入R房排肺水。再遲少少都會救唔番。所以佢一個係屋企好危險。
(係咪D咩上門照顧服務都冇乜用？定排唔到？) 係唔知有呢種服務，好多時唔問就無人會講。
(屋企經濟環境係咪都唔會請到人幫手照顧住少少時間？) 請唔到…之前有社工跟，跟跟下就無下文，跟住試過約陪診，約左又無嚟到。最後都係要自己處理番。因為要帶埋佢去見社工，但係佢番工我番工，所以又無去搞到。以前都係等社工聯絡，有時換左人，跟住就無曬聲氣。
********************
版主CM︰
1) 呢篇係 #照顧照顧者 第一篇投稿，我唔知幾多人明白照顧者嘅辛酸，我只係知道有錢、有地、有人、有資源嘅政府，係殺人兇手
2) 資料補充 – 社署輪候資助長者住宿照顧服務 (截至2020年7月31日)︰
– 共 39,567人在長期護理服務中央輪候冊內登記輪候各類型的資助長者住宿照顧服務
– 申請各類型資助長者住宿照顧服務的平均輪候時間︰
–> 津助院舍及合約院舍︰42個月
–> 參與改善買位計劃的私營安老院︰8個月
(兩者綜合︰24個月)
–> 護養院宿位︰27個月
資料來源︰https://www.swd.gov.hk/……/LTC_Statistics_HP-Chi……
********************
Day Day Explode 日日爆而家有fb同ig啦！
