[R爆黃藍綠]/四/社區人情小店助人不少 卻挨不過黃藍考驗?

R爆黃藍綠之說在前頭:


這年來我們都聽到不少故事,好多都不能簡單以立場回應,我們都很想知道,不同社會位置的人,會怎樣回應這個問題?每個月的處境題,我們都會不記名地邀請兩至三位人士回應。我們希望創造一個平台,讓大家的想法在此進行交流。
同時,必須澄清,R爆頭處境的故事,全乃根據不同人的故事重新組合,故如有雷同,實屬巧合,與不巧合,之外…

R爆處境 四 社區人情小店助人不少   卻挨不過黃藍考驗?

呢一年黃師奶都有啲困惑,因為佢幫襯左廿年,一間人情味濃厚的茶餐廳,竟然疑似係一間藍店!黃師奶多年幫襯,親眼見住有一個弱視的阿叔,每次行入嚟,老闆娘都拖住佢手搵個好位幫佢坐低。黃師奶初時以為係老闆娘親戚,點知老闆娘話係熟客。另外一次,食食下快餐,忽然有個阿叔衝入嚟,黃師奶認得佢都係熟客,而阿叔衝入嚟就叫:「事頭婆唔該俾條鎖匙我呀,我今日又唔記得帶鎖匙!」原來係單身劏房客的士司機。又曾下午茶時段見過有幾個細路在卡位做功課,以為係老闆娘孫女,點知,老闆娘話,一個係單親洗碗員工阿仔,一個係熟客阿女,仲有一個係隔離舖頭阿女。老闆娘仲話:「大家單親家庭我都好明,咁細個點擺佢一個人係屋企去番工啫,唔番工又無錢,你估啲錢真係天上跌落嚟咩!」由於感動於老闆娘真係好人好事,茶餐廳啲野食又唔錯,所以黃師奶成日幫襯,有時都會擺低個十歲的仔仔一陣,自己去番個兼職幫補家計,唔係講笑,果輪每個月賺多幾千蚊,可以幫阿仔報補習班,等阿仔唔好成日覺得人地乜都有自己乜都無。所以,黃師奶都好感激老闆娘。但係,自從去年抗爭爆發,黃師奶食飯果陣就發現,有幾枱熟客成日望住大台新聞係到鬧啲後生仔,老闆娘居然都附和喎!埋單時,黃師奶都有靜靜雞同老闆娘講:「其實啲後生都係想香港好啫。」老闆娘就話:「爭取民主係好,但唔係咁搞囉,搞到個市道咁樣,好多人搵唔到食架喎!」之後,黃師奶就好掙扎,已經好耐無幫襯過,但係個心又戚住戚住咁……

R爆處境題:如果你係黃師奶,到左以家,你會點諗呢?仲會唔會幫親呢?

===================

甲:一位2019年期間成日出POST支持運動和年青人的三子女的七十後阿媽
如果我係黃師奶,我會繼續幫襯。我知道一定俾黃人閙,但係搞到社會咁分裂,究竟係邊個造成?人民鬥人民,邊個最樂見?最得益?藍嘅覺得黃嘅唔啱,黃嘅覺得藍嘅唔啱。政治立場唔一樣,無論對方之前做咗幾多好事,都可以完全否定一個人,甚至去攻擊一個人。其實,文中老闆娘心地好好,佢係想安定,但佢日日俾大台洗腦,唔知道香港已經變咗。佢都認同爭取自由係好,佢唔認同後生嘅爭取方式。飯要食,日子要過,自己過得痛苦,邊個可憐你?有人幫手睇下細路,俾黃師奶返工。如果無人睇細路,亞媽送子女去暫托,份人工都唔夠俾暫托費。唉!現實逼人!其實大家都生活唔容易。黃藍和平相處,唔好中政府計。其實我兩個亞嬸同亞叔都係藍嘅,其中一個亞叔個二仔係警察,而佢個囡同女婿好黃,亞嬸同堂妹經常因政見唔同嘈交。其實亞嬸反而包容個囡有自己諗法。我有同亞嬸飲茶(武漢肺炎前),佢話佢去過撐警,又叫自己子女如果去遊行記得遮面,尤其提個細仔,因為佢嚮中資公司做。藍人有時好好笑,都有心地唔錯嘅。我會記得我亞嬸對我好好,唔會因為立場唔同而割蓆。黃藍都係一樣,人邊有咁完美?我覺得局中人好難睇清呢個亂世。唔認同都唔一定非要割蓆嘅。

乙:2019年前線中後排絲打
我真係諗左好耐 –如果我係黃師奶,當時我見到呢條問題或者呢個情況,我會好想毫不考慮揀唔再去幫襯。因為我覺得要俾返D合理的情緒俾師奶,對住上年咁既情況,如果係餐廳聽到熟人咁樣鬧後生仔,D警暴係咁,個政府咁,又真係好難接受呀事頭婆話佢地喎係咪? 

之但係,廿年幫襯開,都算係有感情,平日又有照顧對方,我睇下你你睇下我咁,呢D都係重要嘅。話哂都因為大家互相幫忙,又的確令到大家生活順左,少左麻煩。對黃師奶黎講,兩樣同樣重要,但黃師奶都會好想老闆娘諒解下後生仔點解要咁樣爭取民主同上街,但係黃師奶都唔想食食下飯時又聽到事頭婆會鬧後生仔哽耳的說話,因為會食唔落同埋會唔開心。所以,我諗黃師奶都未必揀經常幫襯啦,但如果周不時路過,入去吹下水,做下思想教育,送隻連豬俾事頭婆,飲杯熱飲都係得嘅…

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.