轉自：職工盟
日前政府宣布再推第四輪防疫抗疫基金措施，同第一、二、三輪一樣，舊思維完全不變，都仲係派錢俾老細，唔肯直接幫工人。
最離譜係，今次補貼企業更連門面功夫都慳番，同以往保就業計劃做法不同，不再要求申請嘅僱主承諾不裁員同埋繼續經營。即係話，你老細拎完一百幾十萬津貼然後裁員結業走佬，夾帶私逃，都完全唔違反規定。
政務司長張建宗今早出席電台節目，坦白承認今次派錢「無一定要求企業要做甚麼」，認為「人心肉造」，相信政府咁樣幫企業，企業自然會幫番工人。
如果一句「人心肉做」就搞得掂，過往保就業計劃就唔會出現咁多剝削同古惑招數啦！張建宗唔該你唔好再扮天真假無知，明益財團商家攏絡人心用錢買票，點解唔乾脆認咗佢？
人心肉做？我話你班廢官係「狼心狗肺」就真！睇住咁多失業工人走投無路，都仲可以繼續無動於衷，寧願倒晒啲錢去大白象工程填氹，都唔願意搞失業援助金支援絕境掙扎嘅基層家庭，你地個良心睇嚟都一早被狗食咗啦，唔係點做得出咁陰質嘅事？
