港鐵新動力回顧-2020

轉自:港鐵新動力

2020年就好似一架失控的列車。
對大家而言,受武漢肺炎肆虐,生活習慣都被迫改變。對我哋而言,於成立初期已經要面對疫症洗禮,實在措手不及。
我哋正式成立冇耐就同管理層有非正式會面,當時其中一位管理層表示:「你哋同其他工會好唔同」。希望呢一年嚟我哋嘅工作亦能獲得大家認同──對比起員工評議會(SCC)及聯席協商會(JCC),我哋更勇於發聲,敢作敢為,突破框架。
藉此我衷心感謝大家對本會嘅信任。
-重點回顧-
疫症初期,我哋已經敦促公司為員工準備足夠防護裝備,以及促請港鐵公司向港府施壓要求封關,堵截病毒源頭以保障同事人身安全。我哋其後亦有發起聯署,以及動議通過罷工,但最終缺乏人數基礎,成效存疑。理事會經全盤考慮後,決定擱置有關行動。
呢次已經係事隔三十幾年嚟,港鐵公司工會為員工利益進行罷工嘅正式行動。
本會亦曾於Facebook眾籌,於本年8月31日喺蘋果日報刊登廣告。當時眾籌反應非常熱烈,遠遠超出理事會估計。最後更能夠以全版形式刊出「港鐵新動力登報」。
是次登報讓大眾得知仍然有港鐵同事未放棄發聲。
隨後,管理層因登報事件,召見理事會成員,表達有公司同事於登報事件中表示 「唔開心」。我哋重申,人人均享有言論自由嘅權利,加上本會刊登廣告屬工會內部事務,管方及塘邊鶴不應「無的放矢」。

-與管方溝通-
每年,工會與公司會舉行四次季會(2020年第四次季會因應武漢肺炎疫情而取消),會就着不同議題向管理層查詢或要求改善。我哋曾提出以下議題:
•要求公司公開721及831事件嘅閉路電視片段
•建議改善薪酬機制,引入按年資增薪
•提升夜班當值津貼
•改善不同工作場所的洗手間衛生情況
•改善靈活福利網上平台
•促請公司向同事交代大型事故,如紅磡站出軌事故、東鐵線新訊號系統突然延遲啟用的情況
•盡早溝通員工確診武漢肺炎個案,加強資訊發佈
•部份特別津貼(特別嘉許獎)須一視同仁發放
•不同工作場所的流動電話網絡接收信號差
•員工制服及設備改善等等。
我哋亦出席咗多次車務總監溝通會,而每次溝通會都有就不同議題提出意見。就今年而言,最主要覆蓋議題喺武漢肺炎疫情,而我哋提出嘅意見亦得到公司接納,例如加強醫院附近車站清潔,相關車站使用更高濃度的漂白水,建議安排員工代表參觀口罩廠,於消毒標籤上清楚列明使用什麼措施消毒等等。

-工運足跡-
2020年1月1日元旦大遊行,我哋聯同不同界別嘅新工會響灣仔修頓球場擺街站,呼籲遊行人士加入屬於自己行業嘅工會,可惜當日遊行被警方強制終止。隨後響1月中嘅集會亦係舉行途中被警方強制終止。
響2月份,醫管局員工陣線通過罷工動議,要求政府封關,我哋嘅理事及義工團隊均有到醫管局員工陣線街站聲援。
另外,我哋聯同其他陸路運輸業工會有更緊密嘅溝通,例如與新世界第一巴士公司職工會及城巴有限公司職工會發佈聯合聲明,並就各類員工及社會事件交流合作。

-財政-
工會財政穩健,主要收入來至入會費、年費及售賣防疫物資嘅微利,本會嚴格審慎理財,務求 「取之會員,用之會員」。我哋將會於會員大會上公開收入及支出詳細。

-福利及活動-
我哋致力為會員提供不同類型嘅福利,響疫症初期曾經售賣口罩,消毒酒精噴霧,消毒酒精紙,護眼罩等。以便會員能盡早得到保障。除疫情物資外,如商鋪優惠及友商量工會聯盟。而透過以上嘅商舖優惠,希望可以為促進一些良心小舖,響武漢肺炎嘅疫情之下得以繼續經營。

-願景-
非常遺憾,今年因為武漢肺炎疫情工會未能提供更多元化嘅活動,2020的會員大會亦因防疫理由只能一直順延。展望2021,我哋希望所有事物可以盡快重回正軌,喺疫情完結後,可以與各會員有更多交流。

最後祝各位於2021年
平平安安 身體健康 工作順利
港鐵新動力 主席
陳凱暉

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.