【某區天仁茗茶實況】- 事主投稿

轉自:勞工組

大家平時都可能會幫襯天仁茗茶,見到入面好多後生仔後生女做兼職,表面上見佢地都有講有笑咁,好似工作得幾開心,所以沖出黎嘅野飲都唔錯。

原來呢班年輕人好多都係日薪工,而天仁茗茶代理賓仕國際附屬公司「智耀企業有限公司」,走灰色地帶炒人唔賠錢,正正令日薪員工無保障。

以下係事主投稿:

事緣某大西北分店,因店長及另負責管理職員離職,店內只淨返兼職日薪員工,所以變左由高層區經幫忙編更,及處理日常事務。

呢個區經接手管理分店後不斷比說話同事聽,成日例出一大堆日子話冇一個人比人比到更,之後又話「一兩日更的,唔好意思..係唔會作出編排…」

到同事比更又唔編佢返工,咁又話唔夠人返工???

區經請人方式仲特別,左揀右揀,唔知以為選緊「天仁小姐」。有時候仲會問佢挑選出黎嘅人「你有冇邊個同事覺得唔鍾意/唔容易相處,唔想同佢返工,我可以唔編佢更。」

由於平時同事之間相處都和睦相處,一齊返工都好開心,所以唔知個區經講呢樣野用意何在,只會睇得出佢既管理方式好有問題,想搞小圈子政治,建立天仁國安式文化。

情況開始嚴重,無理炒人周不時發生。明明同事有比更,但想炒你就係特登唔編你更,然後大條道理話「你一個月內沒有更就當自動離職」,好多同事都係讀緊書嘅小朋友,唔識咁多勞工權益,只可以無可奈何地以為自己屬於自願離職,無任何賠償。

係疫情期間,生意雖然比平時差少少,但都係唔夠人手。公司經常cut更cut人手,星期六日都係5個人返工,1個人去食飯的話,變相得返4位同事做野,基本上1個人都當2個人用,後台同事又要一路煲珠,煲茶,洗珠,fill野,差唔多時間又開始洗枱,基本上忙到連廁所都冇得去,飲水時間都冇,但係一直以來都冇同公司計,只希望同公司共同進退,但換來只係即時解僱!

有兩位長期返星期六日及公眾假期的員工被經理以「精簡人手」即時解僱,原本個區經應承A員工會補發7天代通知金,最後又話A員工未來7日淨係得1日更,最後淨係補咗一日代通知。

但呢間分店同時又不斷聘請人手,再解僱員工後更即時聘請人手,可見公司根本沒有過多人手問題。

兩名員工係長期返星期六/日/公眾假期。明明天仁茗茶假日就係最好生意,長期都會唔夠人手,點樣「精簡人手」呢?

其中A員工距離1個月左右便可以獲得長期服務金,很明顯地呢家公司喺有心係取得長期服務金前解僱員工,令員工得不到任何賠償。

而B員工的解僱原因更為荒謬,員工同區經澄清一些無理指控,區經就表示你返得唔開心都可以離職,之後又直接同佢講即時解僱,當B員工追討7天代通知金時,區經更表示B員工未來7天都沒有工作天,不設補償,可見呢間公司經常走法律灰色地帶,相當無良。

——————————————————-

小編:

可能有唔少工友都睇唔明,點解日薪兼職都要比代通知金。

其實職場成日都有啲古怪說法,全部都係無法理根據,最典型就係「時薪/日薪/兼職」唔受勞工法保障,事實並非如此!

而所謂「長工」係無法律定義!係無法律定義!係無定義!

目前勞工法只係以「工時」去決定僱傭關係是否連續性,俗稱「4118」,只要合乎4118,就有大部分僱傭條例保障!

4: 連續4星期

1: 每個星期

18:不少於18工時

保障包括:代通知期、有薪年假、有薪法定假期、病假津貼、產假、長期服務金等等。

順便一提,假如你合乎「4118」,你唔做嘅時候都要留意一下,要比幾多日通知期。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.