亞洲移居人士聯盟(AMCB)就受虐菲裔移工爭取公義新聞發佈

轉自:自治八樓

亞洲移居人士聯盟(AMCB)就受虐菲裔移工爭取公義新聞發佈
2021年6月11日
(自治八樓,移工共行委員會成員發言)

咁我係Fifi,我係嚟自自治八樓,移工共行委員會嘅。咁我哋…所有嘅成員都為呢一件事感到非常之痛心,亦都係非常之憤怒。

其實呢件事唔係一個好單一嘅案例。其實可能我哋香港社會不斷都發生呢啲事,只係唔係每一個嘅個案都會被報道或者被發現。

我想喺度首先係分享少少一啲,我喺呢一個疫情入面接觸到嘅唔同移民家務工嘅情況。我有接觸過一啲移民家務工呢,喺佢哋而家嘅狀況呢,就好似啱啱 Dolores 佢所講咁樣,係冇得放假, 已經係成年半以上嘅時間啦。咁…甚至亦都有一啲情況呢係。佢哋俾僱主屋企人打喇,俾僱主嘅屋企人將佢哋個人嘅物品當成垃圾咁樣掟出去啦。亦都有唔少嘅移民家務工呢係,經常受到僱主嘅一啲心理上、言語上嘅虐待。

而喺呢個過程好多我哋見到佢哋啦或者陪伴佢哋去搵入境處或者係勞工處等緊嘅時候呢,尤其入境處,我哋見到好多情況,當呢一啲嘅移民家務工想去轉換僱主。因為佢哋實在承受唔到咁樣去被僱主不合理嘅對待嘅時候,往往佢哋會因為佢哋嘅僱主打電話同入境處投訴呢一個移民家務工,以至佢哋冇辦法換到新嘅工作簽證,唔可以轉到一份新工嘅。而好多時候呢個情況呢,佢哋嘅新僱主係非常之理解佢哋喺另一個僱主,即係之前一個僱主嘅狀況,而係好支持呢一個移民家務工。但係呢入境處就,以一個話,呢一個移民家務工,唔再有合適嘅資格喺香港工作為理由呢,就會拒絕佢哋嘅新簽定啦。然後呢,當呢啲移民家務工想去了解,同埋想去上訴嘅時候呢,入境處就只會用一個,呢一個係一啲私隱原因,所以呢唔會俾呢一個移民家務工去了解到自己點解唔合資格再喺香港工作。而其實呢件事呢已經係持續咗好多年啦,只係喺呢一個疫情入面更加去變得嚴重。

我都好想去講呢就係,除咗係,喺呢個身體上嘅虐待之外呢,其實有好多移民家務工真係每日,好多時間都喺度面對緊,僱主嘅一個心理上或言語上嘅虐待。我聽過好多呢就係俾僱主鬧佢哋,冇用啦話佢哋做唔到嘢喇。然後都會威脅同佢哋講話,我會打電話去入境處,或者打電話去你之後嘅僱主度,令到你唔可以再喺香港工作,要入境處將你去變成黑名單。

亦都會有好多真係,譬如就係好似 Eden 呢個個案咁樣呢,甚至會有僱主呢,聲稱呢要傷害佢嘅生命㗎,或者係傷害佢嘅屋企人嘅生命。咁,喺呢啲嘅情況,點解入境處咁耐以嚟都選擇視而不見,而係僱主可能打個電話,就已經可以令到呢一個移民家務工,去失去喺香港工作嘅機會呢。

我都希望真係呢啲嘅例子,可以幫到傳媒同埋香港嘅大眾明白,究竟移民家務工而家喺香港嘅狀況,究竟係一件咩事。點解佢哋有咁多人,即使受到咁嚴重嘅虐待,仍然係會繼續留喺僱主度工作一段長時間呢。直倒再後嚟呢先至離開佢哋嘅僱主啦,或者甚至可能係完成合約,冇任何報警或者落案呢,都繼續去忍受嘅。

咁最後都希望去表達返,即係我哋呢一班本地嘅,支持移工嘅朋友,都會去繼續支援唔同嘅移工啦。亦都係繼續去要求政府,無論係香港嘅政府,定係係佢哋原本嘅國家嘅政府呢,必需要去提供一個合理嘅保障,俾喺呢度工作嘅移民家務工呢。等佢哋唔會去面對呢一啲不合理嘅對待嘅。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.