文：無米炊 圖：牛
近呢幾個月間中就聽到新聞話咩零售業大跌，仲話勁過1998年金融風暴喎！但係聽真啲，係跌咩呢？聽果個咩香港零售管理協會主席謝邱安儀話，8月珠寶首飾、鐘錶及名貴禮物，大跌47.4%（跌得最勁），藥物及化妝品跌30%等等。喂！你慌會係果啲有個阿伯醫師坐係到果啲藥房咩，哽係跌緊旅遊業果啲啦！街坊病左要食藥，呢啲不會因有人示威而變左無需要喎！
老老豆豆，早幾年大家成日講咩起酒店拆樓，又或者成條街忽然變哂藥房金行，推到啲租金痴哂線迫死哂啲街坊小店，我地搞到連想買啲普通日常野都要過隔離區！今日又聽新聞話好多藥房唔租啦，阿邱主席和劏房波傾過偈之後，呼籲大家業主呀地產呀減下租「共渡時艱」喎…
講真幾十年前覺得腦細十個有九個刻薄，唔想打工，租唔起舖都可以做下小販，之後政府又話唔再發小販牌啦，迫我地去打牛工！以家想話做個小生意？你無番咁上下本都唔洗諗啦–街舖租唔起不在話下，果啲屋邨領展商場舖租貴到你唔信！
以家呢啲過度消費的零售做唔住，唔通唔係，真正為內需而産生的小店發圍的機會？！
其實齋靠旅遊業真係唔得架，唔係淨係香港，之前睇電視，都見到威尼斯啲居民都X哂鬼，大叫水浸啦，話通街遊客塞住哂，人多到工都番唔到，租貴到屋都租唔起。
不過平心而論呢，由於啲差人社區內射催淚彈，就真係會令到連街坊舖都受累。舉例深水埗黃金後邊果條食街，呢輪去食野真係見到少左人，連串燒舖都怕左早收。我忍唔住問下賣茶舖頭拉閘其實最擔心咩，老細話，啲催淚氣體隨風四散，會痴住係啲煮食用具到，如果唔及時拉閘，好難清洗，以後保證唔到食物安全。係喎！唔通成屋搵食架撐換哂佢咩？錢多呀你估！我忽然明白哂！差佬不斷在內街住宅區射，之前都有新聞話啲催淚氣體好毒，痴住有排都唔會甩！！咁催淚法，真係減租都無用啦！
～～～～～～～～～～～～～～～～～～～～～～～～～～
（下篇：因政見被（威脅）炒魷／大作戰！）
編按：收到投稿，作者自言：「覺得好多人誤會基層就係藍絲撑警撑送中，自己都認識好多打工仔女落手落腳在現場做好多野，好似搭棚／剪電線／一齊衝出衝入／甚至一齊撞玻璃等等，仲有啲年紀大衝唔到但晚晚失眠擔心啲後生被差佬打。因此每聽到有人鬧『基層就一定係收錢撑警』，『基層無文化所以不支持民主』時，就覺得好冤屈。另一方面又真係有部份草根又真係唔生性信哂啲政府新聞，唉…今舖真係啞仔食黃蓮！（喂！大家唔好忘記：大把被家中父母長輩鬧到仆街甚至趕出屋的，都唔少係低中産至中産家庭啦！藍絲唔係淨係基層呀！）所以細佬我諗，企在基層打工仔女的角度，講下點解撑反送中示威－－民主自由呢啲大路野，當然舉腳支持無反對，但除此以外都想俾多個角度大家！」
（[草根．行動．媒體] 全力支持言論自由，願意提供平台讓街坊發聲，但不代表本媒體立場。及，連結為編者所加。）
草根．行動．媒體 