佔領一隅：深水埗街坊ＶＳ旺角阿伯

編按：認識一位非常積極地參與社會事務的深水埗街坊A，最近的佔領運動裡，她自發做了公民記者，拎住電話周圍同陌生參與者傾偈訪問，並傳出讓不在現場的朋友都了解一下小市民的心聲。其中一段在旺角訪問住在旺角的阿伯的心聲，頗為有趣。故徵得她同意後，把錄音簡化為訪問稿，與各位讀者分享。

大家會見到，有時伯伯並非全部是答街坊A的問題，也不知是有意還是無意，還是他覺得自己答了而我們聽不明白…不過，其實日常的傾偈，就是這樣遊來遊去，但又不失重點。其實，有去佔領區的人士，基本上本來都不認識，大家不妨與身邊的人互相認識，了解他們的想法和需要，這種過程，也是一種民主社會的練習…

訪問:A 謄寫:阿釘 簡化:小草

A : 今天是十月一日，十二點十二分，我在旺角，匯豐銀行彌敦道行人專用區旁馬路, 訪問一位伯伯。

伯伯呀，現時有甚麼不公義令你行出黎？

伯：你做官個啲，係要咁做，應聲蟲就係共產黨個啲，搞到今日香港咁樣。你知唔知道呀，香港根本係好和諧，好注重自己係香港人，但依家搞到分左兩批人，真係好慘，你共產黨就只聽埋一邊人講的，唔會聽兩邊。得一個版本，累到香港今日有咁的問題。一早你就落閘，未曾聽泛民派既意見再去分析，你聽埋譚蕙珠、范徐麗泰、梁愛詩個班人，同埋個班商家…個啲屋租就高到唔清唔楚，個啲樓呢就去到萬幾萬蚊一呎，你叫個啲打工仔點租呢?全部大財團就壟斷晒，你共產黨就聽晒嗰班人(財團主)講!

舊時嗰班人(財團主)就係我地班手作仔工人去養佢地!唔係學得我朋友個仔去李嘉誠嗰到做野，後生仔話李嘉誠養佢全家人!你唔做嘢李嘉誠俾錢你？我地做嘢，係我地養李嘉誠!

A :係呀，都係啲窮人養佢!…咁你點睇，前兩日政府對市民放催淚彈？

伯：當然唔岩啦。根本你梁振英同個班應聲蟲無政治智慧，就係搞出呢啲咁野出黎。香港班學生，哽係學生嚟搞啦，唔通我地呢啲七八十歲出嚟去俾人抬咩。

A :伯伯我想問你啲屋企人支唔支持呢個運動？

伯:咁要問佢啦!我好自由，唔能夠話監佢信邊個，最緊要佢自己可以分得清楚:邊個係對你有自由呢，邊個係專制你呢？…唔能夠亂咁噏得就噏，係又噏唔係又噏，呢啲就係「應聲蟲」，只係顧住自己銀包。幾十萬，邊個唔幫呀爺?錢就係權啦你知唔知？你唔好叫老野瞓訓街，哽係學生訓街啦，啲後生夠氣魄，識野，唔能夠俾你一黨專政。

A :咁我想問下泛民入閘，邊個最有認受性？

伯:唔係一個版本，聽多一兩個版本。咁你要聽一個版本，啲應聲蟲緊係話好啦。個啲(聘請人的)錢係邊度搵呀，係我地!佢地應攞番出黎，食左我地啲血汗錢!

A :咁伯伯你覺得呢個運動會唔會成功？

伯：今次成功係好難架，好大犧牲，亦都係好難，除非…就算梁振英落台呢，都未必搞得清。應該呢，最緊要係北京…又想台灣統一，又唔識做個啲野，你想用武力呀，無可能架。人地(台灣)會驚你架嘛。

A :點解你肯企出黎？

伯:無咩，我唔出聲呀，等餓死呀？搵啲其它野食都要啦，大蕃薯，都要頂肚，我地日本仔嗰時，都食蕃薯啦，無蕃薯咪食蕃薯葉囉，你咁都唔明白。人係要生存架嘛，唔通淨係瞓係屋企呀？咁咪做井底蛙？世事咩你都唔知，矇在鼓裡。要多啲出黎。你後生，你第日，你係未來的主人翁。心態!你要明白。(我)時間無多，八十幾歲，就嚟「移民」去第二度架啦。